食住消防勢 《救火英雄》

繼上年泡菜推出叫好叫座嘅《火海108》，中港又有套《逃出生天》之後，今年我地有《救火英雄》。

郭子健執導，謝霆鋒、余文樂、任達華、胡軍主演，香港取景，整體而言作為觀眾嘅我評價係：都唔錯丫。
值得一讚嘅係特效，睇左咁多年無記幾可亂真嘅特效，我真係以為果尐就係我地香港人嘅極限，但鋒哥間公司今次呈獻出黎嘅成果，真係令我眼前一亮，雖然唔可以話完美，但起碼做出黎嘅火場畫面我相信就算拎出去國際枱面去比較，都未必會輸。

如果單獨睇《救火》，相信好少人會話套戲唔掂，但係咁短時間內上映幾套同類電影，比較真係在所難免。小弟上年係有睇到泡菜《火海108》嘅，如果《救火》有70分嘅話，《108》我會比到85分。

其中一樣我覺得《108》做得好尐嘅地方就係人物位置交代清楚好多，當然呢樣有少少唔公平嘅係，《108》嘅火災地點係棟樓，可以講明係幾樓，但《救火》係呢方面真係做得麻麻，每個場景之間嘅關係好少提，a地究竟係b房嘅上下定左右呢？有時感覺直情好似打緊機有傳送點，可以飛黎飛去。

《救火》另一樣我本人唔太buy嘅係喺第一個火場入面，對濃煙嘅描寫。話說主角一行人進入災場嘅濃煙中，睇唔到同伴嘅身影，除左少少風聲同燒着野嘅啪啪聲外，就得返胡軍用佢低沉而磁性嘅聲線做讀白：「（普通話）濃煙是敵人，小心濃煙……乜乜柒柒乜乜柒柒」，節奏放慢，但一尐都唔沉重，反而成個氣氛好意識流，同時竟然又好似哈利波特某尐同佛地魔感應嘅場景。喂大佬，我入黎係睇消防片架，你比尐王家衞溝哈利波特我做乜？果刻堅驚佢成套戲都係咁，好彩之後正常返。個導演話濃煙係呢套戲嘅主角，但呢part真係有尐眼高手低。

最後值得一提係胡軍，雖然套戲無提，但我相信劇本係設定佢黎自超人嘅故鄉，如果唔係點解釋佢係套戲入面行嘅各項神迹？其他唔講，淨係提一點，套戲主要嘅火場係一個巨大發電廠，個立體建築圖仲複雜過prison break入面果個，胡軍經過一程車之後，竟然用佢低沉而磁性嘅聲線表示：「（普通話）地圖我已經記住啦。」而且仲唔係作大!果下真係以為睇緊007或者mission impossible果尐特務片……

總括而言呢，《救火》無疑係有心之作，加上仲有鋒哥嘅新歌做主題曲，雖然係有幾多不足，不過都值得支持嘅。