40倍喎，唔買就笨

球證哨聲一響，O比三，曼聯又在奧脱福恥辱性地輸波，仲要係死敵利物浦。一班紅魔面目無光，莫帥一貫輸波個樣。全世界唔係唾罵佢無能，就係歌頌佢領導有方，專幫敵隊搶分。唉！好心你哋唔好咁膚淺啦，根本莫耶斯係世外高人，全世界只有一位智者能洞悉莫帥嘅密圈，就係佢自己嘞。

咪睇莫Sir個樣咁西洋，查實佢熟讀中國兵法…………嘅其中一句:置諸死地而後生。重建曼聯嘅最好同唯一方法，就係要輸到pk，輸畀紅軍後前四希望徹底幻滅，所謂知恥近乎勇，呢班紅魔得番個歐聯可以博，仲唔砌到佢反艇呀？咁絕都畀你諗到，Bravo！

仲有喎，唔該你哋用邏輯諗吓啦，曼聯咁大間球會，班大户老細咁貪錢，你估佢哋唔驚業績股價插水咩，仲唔炒佢?佢哋梗係有內幕貼士，知道莫帥有驚天大計啦，老友!

星期三對奧林比亞高斯，係反底好時機，記唔記得N季前利物浦喺歐聯分組賽瀕臨出局，喺最尾一輪就係以三比一贏奧林比亞高斯呀?呢個賽果，直頭係對紅魔好有利啦！仲有喎，有一項歐聯鐵打咁硬淨嘅數據對曼聯更加鼓舞，就係差唔多廿五屆無球隊衞冕成功，拜仁已經打入八強，代表少隻香爐少隻鬼，最強對手自會有天收，連個天都幫我，仲諗咁多?去啦！

嘩！睇睇足智彩賠率，曼聯冠軍竟然有40倍喎，咁筍，梗係重槌........10蚊咁大把啦！今個星期三晚，今個球季最重要嘅一場賽事，各位球迷，不分左中右前後上下紅黃黑白啡，記緊買定花生，睇紅魔創造奇蹟啦。Let's go, rock 'n roll！

足智彩話畀你聽曼聯好Q抵買!

無話可說X100

莫Sir輸波仲笑得出，梗係有計啦!

 

後來居士：新兵新力量，真鳩斬無雙

早兩日講到新兵新力量，兩個冬季新援就即刻交到功課，仲一齊打咗場焦點大戰。由北倫敦借到南倫敦嘅賀治比，開波唔夠廿分鐘，就斬出個靚助攻，幫富咸意外領先；混戰一粒鐘後，紅魔今次「馬」到堅成喇，另一新兵馬達似傳又似射嘅一腳，啱啱好落到rvp腳下輕鬆扳平。不過喱腳交地波似乎就有啲落莫爺面喎！點解？有圖有真相。

曼聯全場81次斬波位置圖

喱場嘅賽後焦點，除咗臨尾摸和外，曼聯全場狂斬81次更令人嘖嘖稱奇，而且仲刷新埋單場斬波紀錄𠻹，莫爺今次總算破返個正面啲嘅紀錄喇掛？連富咸領隊、亦即前曼聯助教梅倫史甸，賽後都要幫莫爺講返句公道說話：「你哋咪話莫爺冇戰術啦！我覺得紅魔班球員已經完全執行咗領隊嘅戰術喇。你睇佢哋？全場嘅傳波同射門，模式幾乎全部都係一樣㗎！」之但係阿梅後嚟又補多句：「我哋做好晒賽前部署，所以防守佢哋，其實唔難囉！」

不過對於莫爺fire in the hole嘅打法，好多曼迷朋友就唔多受落喇，小到佢撻皮。有位有heart球迷仲整咗條濃縮精華片，用3分鐘帶你重溫喱81個精彩斬波之旅(http://www.youtube.com/watch?v=tKC9KdBCgW4)。亦有人揶揄莫爺一味斬一味斬，似「黑社會足球」多啲，講講吓連「game」都出埋...

大埔lulu都有share喱隻「新game」

當然喱隻「game」只係ff，曼迷未必有得玩啦。但話時話，好似打winning時hang咗圓圈掣嘅喱隻戰術，都係傳統英式高Ｑ大棍打法吖，做咩大家好似好出奇咁呢？況且81次斬波冇收穫，學我哋啲高官話齋，係個別事件姐，或者聽晚對阿記又有用呢。上半季「藍神」暴走時，都係紅魔斬一個角球end咗佢哋嘅連捷咋嘛，可能真係可以大棍扑爆槍呢！阿記啱啱都廿分鐘失四粒啦，波係圓嘅，好出奇呀？

馬到功成? 還看曼聯

一比二，一個很熟悉，卻又很無情的賽果。曼聯，衛冕冠軍，作客不敵史篤城，今季第八場英超敗仗，剛巧是每三場便輸一場。冬窗買了馬達，冀盼「馬」到攻城，奈何卻是一仗功成，贏番一場又輸過，曼迷情何以堪。不過，利物浦名句：你不會寂寞地行路，因為，一眾反曼迷癡癡地、默默地，在每場波都為你們「打氣」。

 

試問香港「馬迷」又點及「曼迷」多。新春伊始，香港利物浦同志會會長、有滲漏哥之稱的蠔哥，在剛過去的周末，急不及待深入敵陣，相約三門知己、9NEWS忠實讀者史必得與蘇古迪，到「歡喜」吧睇曼聯，目的非常顯明，唔係攞景就係贈興。

 

「呀！入啦！」「嗚…入咗喇！YEAH」。馬達助攻雲佩斯追成平手，史必得極其亢奮。唔講大家唔知，原來史必得係是超級紅魔擁躉，他要和一位遠在別國、私交甚篤的紅顏知己，默默守護着共同的愛隊，無論是四大皆空、甚或降班，他們也會不離不棄，生死與共，五十年不變。這麼遠那麼近，真是感人肺腑。想不到近在這張枱，遠至任何一國，甚至是最親的枕邊人，都充斥著一眾背叛他的反曼中堅份子。利記棄將查理亞當世界波，幫史篤城再領前二比一，猶如一把利刃從後割開了史必得的心，一眾反曼躉振臂狂呼，史的確不是味兒。「難道愛曼聯就是原罪?點解世界上咁多人歧視我哋嘅癖好呢?只有你，才明白我！」他也許不知道，世上是沒有無緣無故的恨。

 

「好嘢！入咗！抵錫！」一比一時，蘇古迪與他的金主史必得一唱一和，殊不知他卻是一名「切頭切尾」的巴塞狗，反紅魔出晒汁，奈何要看主人面色，主人捧七佢就捧七，惟有以擁曼形象掛帥搵食。五年前一個晚上，蘇與同伴在同一夜店睇歐聯決賽巴塞對曼聯，全晚不停口捧巴插曼，辣起火頭。結果巴塞如願捧盃，他卻為愛隊付出沉重代價，被憤怒的輸波球迷狠狠的執了一劑。一朝被蛇咬，自此阿蘇往往口捧曼聯，實則對曼聯恨之入骨，眼見今季曼聯仆直，暗自竊喜。香港球迷們，你們當中又有幾多人懼於曼聯躉的龐大勢力，和阿蘇一樣，忍辱偷生，隱瞞反曼的本性呢?相信不在少數吧。

 

「阿蘇，你慳啲啦，反曼狗!」滲漏哥唔識趣踢爆阿蘇的真正身份，阿蘇嚇到標屎，急忙向主人澄清，卻無補於事，最終再受酷刑，一聲慘烈嘶叫，軟癱倒地。呢位不怕強權的滲漏哥，捧了十九幾廿年利物浦卻一事無成，英超冠軍仍遙不可及。仇恨源於嫉妒，曼聯威足廿幾年，羞辱了紅軍四分一個世紀，當然要還。紅軍咁耐未攞過英超係自己唔爭氣，干曼底事?蠔竟答道:「反佢老母咪反佢老母囉!反埋佢老竇都仲得。」一句豪情壯語，掩不住內心的恐懼，利記今季表面風光，但在冬窗卻零收購，宿敵曼聯衰極都只係落後佢哋六分，加上人哋買埋馬達如虎添翼，以紅軍往績，被過頭好正常。一日之後，利記果真失分。喂，利物浦粉絲，顧掂自己先吧。

 

一比二，家家有求家家有求。史必得，你不用悲傷，縱然曼聯今季仆直是既定事實，但是無論輸贏，你們都引來全球注視。就算曼聯繼續衰足廿幾年，甚或降埋班，皇朝仍然不滅，保守估計起碼仲有廿幾年被人「關注」。當你看見國米AC呢對襟兄弟呢幾季夠衰到貼地，卻又乏人談論，便會有所領悟。輸了八場波，贏了全世界，值得嘅 (應該係)。

馬年殺到，祝各路英雄一馬當先，馬到功成。

終於分手了‥‥‥

「真係架？點解嘅？真係架？點解嘅？‥‥‥」慾黃啱啱瞓著，突然畀一篤又一篤嘅電話鈴聲驚醒，而整呢個咁嬌艷鈴聲嘅，就係慾黃嘅情人涼涼喇。慾黃畀涼涼嘈醒，本身都有啲燥架喇，但聽完個電話之後，佢就決心同涼涼分手！

一望慾黃個名，就知佢對任何黃色嘅事物都有不能自拔嘅沉溺，由此推論，德甲18隊入面，佢愛隊肯肯定有蜜蜂仔多蒙特份啦。可惜多仔剛剛就畀奧格斯堡摸和，仲要搞到波蘭小鋼砲巴錫高夫斯基傷膝提早收咧，真係賠了夫人又折兵，慘過冬天飲杯思樂冰。

慾黃望住愛隊失分兼失猛將，本來一路睇波一路睇甜片嘅雙料娛樂頓時失晒光彩，而慾黃為咗向小鋼炮致敬，亦都收起咗佢支炮，連夾硬湊夠六十蚊先叫到嘅麥麥送都無晒胃口食，一手就掟落垃圾桶，跳落床大覺瞓希望瞓醒當無件事，但切膚之痛邊有咁容易釋懷？慾黃成晚輾轉反側，此時此刻最渴望GEM嚟把佢灌醉‥‥‥願望當然唔會成真，所以慾黃都係繼續輾下側下，終於都畀佢臨天光瀨尿前瞓著。

慾黃瞓著無耐，「真係架？點解嘅？真係架？點解嘅？‥‥‥」除除響起，涼涼追魂Call，慾黃點敢唔聽，無神無氣嘅一聲「喂‥‥‥」，涼涼就立即未到新年放炮仗︰「BB呀，你知唔知道前晚拜仁贏咗波呀？我超開心囉，第一粒仲要係我至愛嘅股沙入架，呢啲咪醒目仔囉，多蒙特呢啲屎波真係早走早著啦，尋晚就抵佢哋死啦，畀隊唔知乜鬼嘢逼和仲傷埋個矮仔，睇見都心涼呀，股沙去拜仁即刻勁咗幾多呀，你話係咪呀？下季仲多埋個利雲杜乜基話，總之勁嘅人去晒拜仁就啱架喇！既然拜仁咁犀利，你今個月記得加我零用錢賀一賀佢喇！」慾黃聽到呢到，就諗起大半年前佢同涼涼喺人間妖域相遇嘅一幕‥‥‥

當晚係歐聯決賽，慾黃淘咗件多仔頂級泰版終於都收到貨，興高采烈襯歐聯決賽著出去威威。喺全間酒吧一片紅海下，慾黃嘅出現惹來一陣仇視，見勢色唔多對路，慾黃諗住轉場之際，眼前就出現咗同樣著住件多仔波衫嘅涼涼，慾黃心諗多仔球迷人數霎時間多咗一倍，一於唔轉場同條女一齊力抗紅海！

最後場波結果唔多講，不過輸咗場波，多咗個涼涼，慾黃當時都覺得有賺。可惜只係過咗半年，多仔就由歐聯亞軍變咗涼涼口中嘅一隊屎波，涼涼亦轉投拜仁懷抱，而慾黃亦終於明白涼涼愛拜仁嘅原因，係佢同拜仁一樣都愛盡收天下兵‥‥‥一諗到呢到，慾黃覺得同涼涼緣份已盡，深呼吸一啖氣，好瀟灑咁吐出一句︰「分手！」之後頭也不回就收線。

定過神後，慾黃心諗自己一世英名，閱女無數，點可能會衰喺涼涼手上？佢打開衣櫃拎毛巾諗住沖個靚涼思考下，但一開衣櫃，答案已經出現，慾黃原來都有阿仙奴今季件作客波衫‥‥‥

祝波蘭小鋼炮早日康復！ (多蒙特官網)

無情夜冷風

經過英超快車期一輪激戰，睇住個積分榜啲排位好似過山車咁上上落落，都咪話唔過癮。本以為可以抖一抖，飲番罐啤酒，點知英格蘭足總盃第3圈又殺到埋嚟喎，當中又不乏英超球隊嘅對碰，咁就緊係要支持吓啦！你估我真係咁天真走去同你睇蘇超些路迪對聖美倫咩！  

本以為紅魔喺第80分鐘拉菲爾做咗紅牌阿姑，頂！又認錯咗，應該係法比奧先啱，踢少個可以死守到完場等重賽架嘛。點知就喺臨完場之際，畀史雲斯近期狀態相當弗嘅邦尼一記有lv.3嘅超級頭鎚絕殺咗，真係當堂喊咗出嚟！不過，係呼喊個喊呀，因為史雲生清雞湯歷史上從未試過喺奧脫福羸過波，今次真係威過威士忌喇！但係紅魔都唔使灰心啦。點解？因為依家唔使重賽，打少一場喎，人地同市死敵又要重賽，掘金之旅又泡湯，家吓莫耶斯可以專心番打聯賽同歐聯，慢慢執番掂隊波，計落仲賺咗添！（好似係）  

唔知係咪叫和仔嘅都特別惹火啲嘅呢？以前就話有旺角場呀叔媽叉擁有底線傳底絕技嘅和仔啫，今日就有呢個禾仔。事緣阿仙奴對熱刺場波，嗰陣去到下半場尾段，禾仔被侵犯受傷倒地，然後再被一眾軍醫抬出場。雖然係主場啫，但禾仔似乎寸咗少少喎。佢坐咗喺擔架上面，無啦啦舉起左一個V字手勢，右一個拳頭，仲笑淫淫咁對住觀眾席。嗱，主場球迷見到就緊係開心拍爛手掌架，成個看台仲濕晒添！但就難為班熱刺fans，激到佢地起勢爆粗兼夾舉中指問候。本周呢個畫面的確令筆者幾深刻。  

足總盃頻頻吹冷風，真係吹到有啲凍。提提大家捱夜睇波之餘，記得著多件衫啊！講咗咁耐，究竟場波最後踢成點呀？仲問？禾仔已經答咗啦！  

圖片來源：波波池

2013最精彩的球和事

唔好亂吐痰，唔好摸糞便……當大家唱緊Jingle Bell之時，又係每年年尾一堆堆乜乜回顧嘅時候，總結了五大聯賽2013改朝換代後，亦是回看今年的最靚金球和最震撼事件的時候….

鄧鄧鄧鄧……2013感動球壇酬賓周頒獎禮，現在開始…...

會場上星光熠熠，叫得上做球星的人物，一個不漏統統出席。

….首先，我們將會頒發2013年度最佳金球獎……

美斯氣定神閑，洛賓一臉自信，伊巴則與C朗怒目相視，伊巴稱：全世界都睇過我果球30碼外倒掛收死英格蘭，祖赫特自此變早嚇突，我又有球場呂布呢個花朵，唔係我攞唔通你呀? C朗以一雙獅眼回敬：咁又係呀，我今年入波多到自己都唔知邊球打邊球，我真係唔知點選，係喎，你今年入波都好似冇我一半咁多。伊巴無言，只有一聲啤。

頒獎嘉賓古迪上台，全場屏息靜氣……

古迪揭開大信封，一臉驚訝，雙眼仿如IQ博士般突了出來連卡紙也險插穿。

得…..得….獎…者,…者係啫係啫啫係呢個….李…..明..!

全場先鴉雀無聲，後是一堆夾雜粗口的鼓譟…..邊..個李明?乜水?有無搞肯錯…..

古迪讀稿：全靠李明在臨完場前呢球炮彈頭槌絕殺，幫友會橫濱FC香港打開勝利之門，體現球場友誼第一的精神，可喜可賀，欽敬欽敬….

李明接過獎後，頭也不回一個人直奔後台，其他球星有些不甘心地倒在地上，有些走到頒獎台向白禮達投訴，巴神則丟掉球衣。橫濱FC教練坦言：賽前我諗過贏，但估唔到過程係咁。屯門領隊李潤華及教練甄力健則表示：唔識講、唔想講。及後更宣布辭職。

 

緊張時刻唔好畀佢停，緊接頒發的是2013感動球壇最能感動你最喜愛的事件….頒獎嘉賓一代世紀金球得主勾廢卵上台。

得獎事件係…..富明尼斯成功爭取被挽留巴甲…..

台下曼城領隊柏歷堅尼馬上釣了一聲：有冇搞錯，我烏龍計錯數特肯登入少一球，等拜仁成功爭取首名出線歐聯十六強，曼城又成功爭取到挑戰聲稱地上最強嘅巴塞，咁都唔夠感動?

勾廢卵又讀稿：本來上年巴甲冠軍富明尼斯今年排17要降班，但係友會波圖基沙適時在臨尾一場派出停賽球員上陣，結果判扣了四分取代富明尼斯跌落降班區，捨身成仁，令友會不致顏面無存。

阿卵有感而發：當年我踢果隊南華險降班，足總挽留畀人鬧到隻狗咁，真係羞家，依家巴甲模式以機制成功挽留班霸，體現法治精神的可愛，唔係值得表表佢咩?

慶祝紐倫堡破紀錄

嗱！嗱！嗱！即係咁，咪話我哋呢啲睇波撚睇英超淨係識得睇Big 4(今季唔使講都知唔計曼聯啦)、睇西甲淨係睇巴塞皇馬、睇德甲淨係睇拜仁多蒙特，我份人咁有衣食，尋晚場餸頭餸尾紐倫堡對緬恩斯，唔使問都知我實有睇啦，咁先至係一個合格嘅睇波撚嘛。

紐倫堡個中場清武宏嗣尋晚開波四分半鐘就底線出波助攻先開紀錄，其實我一啲都唔出奇，BFB入面佢作為三星友個數值都算見得下人，你見我玩到成50 Level都用佢做必然後備就知佢幾有料啦。

但另一邊廂大家都唔好忽視緬恩斯個㗎仔箭頭岡崎慎司喎，佢名符其實就係一條跑狗，踢史特加嗰幾年都冇甚表現，淨係識得喺前面喪跑，今年過檔緬恩斯就有啲睇頭喇。尋晚就係佢單刀冇得橫傳下入一粒，搞到兩個同胞又要返屋企攬住個枕頭慶祝紐倫堡破德甲紀錄連續15場不勝喇！
 
所謂在家千日好，出外靠朋友，清武宏嗣同長谷部誠兩條友今鋪真係識錯朋友喇，我寫包單如果佢哋尋晚有把武士刀喺手，一定捅鳩死岡崎慎司啦。由此可見日本仔咁唔團結，釣魚島實唔夠我哋爭啦！嗱，話定你聽，下個禮拜德甲又會破紀錄㗎喇，破咩紀錄？睇返上面啦！

                                                                        岡崎慎司