捷足先登：咁你玩晒啦！

歐聯，從來都係兵家必爭之地。得罪講句，識打嘅一定爭歐聯嚟打。喂，你睇利記熱刺喱幾年爭餐死為乜就知啦！歐聯喱個台唔易上(好似係)，所以上得去嘅，實會霸返一段時間。唔信？我哋即刻做回帶拎睇睇：

【認真討論】過去９年歐聯淘汰賽一覽

有少少資歷嘅球迷大概都會記得，05到09年間係英超嘅光輝歲月，每年最少有一隊殺到入決賽，而07、08、09三年嘅四強，更加係三「英」戰呂布嘅格局，你都咪話唔「近」！不過亦係08年左右開始，西式足球建立咗佢哋地上最強嘅統治，除咗巴塞連續六屆打入四強，「西超」雙雄巴塞皇馬亦包攬咗喱三年歐聯四強嘅一半席位。至於重振聲威嘅德國波呢，盡「德」兵器嘅拜仁就喺近四年三闖決賽，舊年仲同同胞多蒙特上演史上第一次嘅德甲打吡決賽添。吓？開始睇唔明我講咩？sor9ry講到1999，大家都係睇返上面有圖有真相啦。

其實講咁耐，小編都只係想學魔童叔叔咁講句：咁你玩晒啦！冇錯，歐聯台上總係有一個個霸主，創出令人由欣賞睇到冇癮嘅「玩晒」皇朝，由十年前嘅意甲統治，到之後嘅英超盛世，然後西甲稱霸，再到德甲崛起都係咁。唔講太遠，巴塞夢三開始時人人話神乎奇技，幾年後人人嫌棄「又搓呀好悶呀」。當你玩晒，就人人想你輸，然後誕生一個新霸主，再周而復始。不過歐聯有潮起，亦真係有潮落，英超今年似乎真係「出得嚟行預咗要還」， 16強已經有阿記曼城先後被out，剩低嘅曼聯次回合要逆轉0-2敗局，車仔亦要防止俾加拉塔沙雷作客偷雞，形勢真係不容樂觀。一個唔小心，今個週中隨時睇住8強連續兩屆冇英超波！

不過講返轉頭，歐聯決賽圈近年少咗大國球隊，都係因為柏天尼保護弱勢嘅改革，令好多大國波喺外圍賽已經要互撼。其實歐洲足協都保護弱勢啦，或者我哋亦要學習吓，唔好再講「_你亞記嚟嘅喂」。至於搬龍門喇喎，歐聯歷年都唔知有幾多「北京電視機」啦，好平常姐。吓？你仲係要講「咁你玩晒啦」？啱啱先講英超已經收緊水，而巴塞亦好似有啲跌watt，即管睇吓拜仁今年係咪再殺入決賽先講啦。其實唔會有人永遠「玩晒」嘅，有心睇嘅，就算電視真係冇得睇，咪上網睇囉。怕就怕到你有得睇時，睇幾年又嫌悶姐！

中途轉機? 普京幫到你！

別怪他!別怪他!二月情人笑呵呵，一眾捷足與居士嘅門徒變晒"何盡淫"，個個有異性冇同性(vice versa)，玩大咗做晒"脱星"虛脫冇貨交，實在有負各位看官的厚愛和期望，對此筆者向大家致以萬二分歉意，抵插抵插(佢哋咋)。

 

一眾歐洲列強喺今年雙料情人節就冇玩大嘞，隊隊都好對辦，期望早日到岸以免好夢成夢遺，當中都不厭其煩，又要讚吓宇宙隊拜仁，點解？我就用數據打你:

 

歐洲九大聯賽前列線形勢

 

德甲 (尚餘11周)

拜仁          65分

多蒙特      45分

利華古遜  43分

 

意甲 (尚餘12周)

祖雲達斯   69分

羅馬           58分(少賽1場)
拿玻里       52分

 

荷甲 (尚餘 8周)

阿積士       57分

川迪           49分

維迪斯       49分

 

法甲 (尚餘11周)

巴黎聖日耳門   64分

摩納哥              56分

里爾                  49分

 

土超 (尚餘 11周)

費倫巴治          51分

加拉塔沙雷      45分

比錫達斯          43分

 

葡超 (尚餘 9周)

賓菲加        52分

士砵亭        47分

波圖            43分

 

英超 (尚餘 10周)

車路士        63分

利物浦        59分

阿仙奴        59分

曼城            57分(少賽 2場)

 

西甲 (尚餘12周)

皇馬            64分

巴塞            63分

馬體會        61分

 

俄超 (尚餘 11周)

辛尼特                40分

莫斯科火車頭     40分

莫斯科斯巴達     39分

 

一目了然，抛離二十分，多蒙特喎！上屆歐聯亞軍喎！贏過皇馬嗰喎！照咁計，拜仁去到西甲咪可以抛離廿幾分。德甲，世界第一最早洩聯賽，當之無愧。

不過，世事無絕對，德甲有冇機會翻盤？問peter黃佢會答你有兩個:冇機會同非常渺茫。非常渺茫即係仲有計啦？係架，至少有一個，就係靠新沙皇普京幫幫手，立即吞併半殖民地克里米亞，再趁烏克蘭臨時政府陣腳未穩之際兼歐美採取綏靖政策，直搗基輔，再發動閃擊戰，攻陷不堪一擊嘅波蘭，再要望一向自傲嘅德國人輕敵，擊破驕兵，豪取日耳曼，到時德甲就會被消失或併入俄超，咁樣拜仁就再唔係冠軍啦！

講完廢話又要講番波，今周拜仁作客禾夫斯堡喎。唉，都係嗰句啦，哥迪奧拿，你想要幾多球呀？出聲啦！

 

 


　　本是German club, 相煎何太急

靈籤顯聖，馬到功成

適逢馬年，馬場今日必定有大批馬迷入場支持，旺丁又旺財；不過除此之外，亦有另一班「馬迷」會齋戒沐浴，今晚誠心力撐自己嘅「心水馬」喎，講緊嘅係「皇馬迷」、「馬體迷」同埋「羅馬迷」，因為喱三隊今晚將會出戰馬年第一擊，一眾「馬迷」自然希望開門紅，拉個頭馬攞個頭彩啦！而眾所鳩知，農曆年初三，求靈籤最啱，今次就等我哋化身成「捷足仙人」，幫喱三匹弗馬，用特別的求籤技巧求返支靈籤，睇吓今晚、下半季，以至喱個馬年，佢哋三隊有冇運仔！

嗱嗱嗱，咪話唔賣花讚花香，我哋嘅求籤技巧真係很特別而又科學化：車公靈籤有96支，所以我哋用casio計數機random掣揀個三位數，再攞尾兩個字作為籤號(唔明點用？返中學問阿sir啦)。結果就為皇馬求得五十九籤上籤，馬體會五十八籤中籤，同羅馬嘅五十一籤中籤。

好，一齊睇吓籤文喇！

皇馬嘅五十九籤係「名也成時利也成，原來教子在窮經；若然不積修行路，縱有名利亦恐傾。」解曰名利兩得、求財暫發、不去其惡、福盡禍來。籤文話皇馬名利兩得，睇落幾好，今季喺巴塞下滑同馬體會未完全爆發之時，可能有機會爭到冠軍，而原因係「教子在窮經」，即係一班年青嘅小將對爭標過程有相當幫助，之但係皇馬不嬲財大氣粗，如果不去其惡又將有潛質嘅佢哋掃走，就算今季有盃落袋都「縱有名利亦恐傾」。睇嚟夏季有冇翻版奧斯爾事件，將會影響住皇馬嘅馬年運勢喎。

至於馬體會嘅五十八籤係「臨機亦要細思量，妄作妄為欠主張；見利自然無計義，貪心誰道能久長。」解曰貪心折福、求財半遂、胡作非為、貪不遠貧。明顯地，今季馬體會彈起，令西甲近十幾年嚟第一次有返競爭。不過籤文就勸馬體會「臨機亦要細思量」，施蒙尼嘅大膽戰略唔好太過火，唔係可能慘於門前撻Q。仲有喎，今季陣中煲起迪亞高哥斯達、高基等球員，歐洲好多大會都虎視眈眈，如果夏天貪財賣走晒，喱支啱啱崛起嘅異軍就「道難長」喇。

最後羅馬嘅五十一籤係「事業求謀且待時，若然亂動失原機；馬行千里須防倦，遠病年深不可醫。」解曰待時至、莫急進、留餘地、莫強求。羅馬今季一度超越近年壟斷意甲嘅祖記，可惜「馬行千里倦」，而家後勁不繼，籤文似乎就揭示羅馬爭冠今季仲未係時候，太勉強隨時連歐聯喱個「原機」都失埋，而chur得太行仲可能令主力受傷，球隊戰績到時就真係「不可醫」囉。

睇到喱度，可能已經有唔少「馬迷」爆粗話捷足仙人嘅解釋肯肯定有問題。冷靜啲先，新年流流求支籤都係攞個意頭開玩笑姐，你睇每年發叔傻更更個歡喜樣，就知認真就輸了啦！膠噏咁多，不如睇波，喱三隊今晚將會喺十點、兩點同四點分途出撃，大家千祈唔好錯過喇。

最後我哋捷足仝人，恭祝各位球迷嘅愛隊喺馬年，求人得人，馬到功成！

今晚只看一場波

壟斷有幾咁可怕?係呀，今期捷足先登又講拜仁嘞，問你怕未?不過介绍今晚場波之前，先考考大家，假若你係某基佬台嘅員工，你會點sell德甲呢？

「埋黎裝，埋黎裝，裝人不如自己裝。」催銷員A係基佬台星級sale屎，以厚顏無恥聞名於天下，一眾擺檔嘅行家也看不過眼。今日，佢又同往時一樣，在繁忙嘅街道上叫賣，大搖大擺，旁若無人。「宇宙第一聯賽德甲今晚竭完冬返嚟啦，仲係宇宙最強拜仁對慕遜加栢打頭陣添，你仲唔埋嚟?」路吟月乃係一名自命識波之人，在街上聽見催銷員A如此叫囂，抵不住頸，上前挑機！「喂，老友，你講乜九嘢宇宙最強聯賽？有乜根據？信唔信我告你違返商品說明條例，等你畀人通通櫃。」

「呢位靚仔稍安無躁，是咁的，拜仁舊年攞歐聯你都知啦，四強仲要贏聲稱地上最強的巴塞七粒。咁都未夠喎，連佢哋嘅鄉里多蒙特都威到串埋條決賽Q，係咪叻叻豬先？奈何歐洲足協都唔化，仲喺度計埋啲咩五年系數，搞到德甲依家仲係歐洲第三。喂，講舊屎就食屎啦，五年？足球同政治一樣，一日都嫌長。咁好啦，未做得歐洲第一住，咪禮讓啲，姑且做住宇宙第一先囉。」A答道。

「宇宙第一又點先，德甲好似無乜球星，有乜好睇?」路心心不忿，試圖駁咀。「邊個話冇球星，聽住！紐亞丹迪拿姆小豬卻奧斯湯馬士梅拿列貝利洛賓艾簡達拿文素基治「古沙」，仲有利雲度夫斯基，多到呢，問你死未。」A如數家珍，一輪嘴唸出來卻面不改容。

「又係喎，咦！咪住先，乜全部都係拜仁球員嘅？呀！有半個未係。唓，咁咪成個聯賽得一隊拜仁踢，有乜好睇？」路不滿道。「喂，一個星期睇一場波仲唔夠呀？仲係個個禮拜有拜仁畀你睇喎，仲唔心足？後生仔，有時間就打吓波、唱吓K、媾吓女、陪吓屋企人食飯，睇咁多波托咩！」A理直氣壯般反駁。

「又係喎，er......但係咁喎，我打winning最憎啲人猜波猜到我傻仲要數我幾粒，我實剷跛晒佢啲人最多攞幾張紅牌洩憤。呢隊拜仁就係踢得咁賤，但係你叫我點洩，掟爛部電視你賠呀？」路依然磨爛蓆。「唔使驚，我哋門市部有好多產品介绍畀大家，電視機飯煲燙斗乜义都有，客户價九五折，撻我花朵仲有五九折添，很想要吧？」A從容回答。

「哦，咁好啦。」可憐的路吟月敵不過A的三寸不爛之舌，從此就範，揮了筆，獻上了信用卡。更可憐的，就是路也不知道，催銷員A今晚收工後也只看一場波，就係足總盃阿仙奴對高雲地利，真係關人個關。

 

哥帥：今晚想要幾多球，出聲啦。(拜仁官網圖片)

 

德甲又開波喇！

不經不覺，對上一次睇場德甲直播都已經係上年聖誕之前。點解我咁鍾意睇德甲？無他嘅，我成長嘅年代，雞寶都未出世，而且喺過去又邊到會有現在呀？！要睇波，就當然又搵阿叔啦。講起阿叔，又喺時候講史‥‥‥

小學雞年代，啲搣時阿蛇個個都大把時間改簿咁款，星期六返長周就畀至少十樣功課，有時星期五就已經打沉我諗住老竇羸馬屈佢星期日帶我去海洋公園嘅美夢，我肯肯定班搣時阿蛇一定有問題！點解政府依家熱播嘅「小朋友都要玩」條宣傳片，廿年前仲未有呢？(答案在第一段)

好，你有張良條計，我有過牆條梯！星期日冇得出街？冇問題，我搵阿叔陪我！星期日睇「球迷世界」係至高享受！當年除咗睇紅衫白褲左攻右嘅南華，靠埃住右路偏左嘅和仔底線傳底畀單刀橫傳嘅死火倫門前空龍失機之外，「球迷世界」嘅另一亮點就係德甲喇！

德甲係我第一個認識嘅歐洲頂級聯賽，亦都令我認識到原來港甲啲波真係踢得好慢囉！嗰時睇住光頭佬贊卡同艾爾巴喺拜仁踢到曉飛咁款，絕到令我眼前一亮，加上當時有個叫楊晨嘅中國人踢法蘭克福，雖然做後備居多，但話晒大家都龍的傳人，所以我每個禮拜都好期待由阿叔把口聽到楊晨入波！

講完史，又喺時候講下依家嘅德甲。歇冬時利雲杜夫斯基終於決定唔食蜜蜂糖，鋤弱扶強去拜仁，佢咁做令我好唏噓。其實德甲好睇之處，就係年年都有隊中游唔起眼嘅波爆seed搶上前列甚至拎埋冠軍，近嘅唔講，遠嘅追溯到去上世紀97/98球季，升班之馬凱沙羅頓一上德甲就攞冠軍，其他聯賽有邊個可以媲美？就因為有呢啲不確定因素，令各隊對壘時就更加刺激啦。

高普未帶多蒙特時，多仔都有段時間做中游，執執下隊波先做到依家成為連伊巴都識嘅勁旅。但拜仁永遠都係搞亂檔，盡收天下兵器入庫，長此下去，德甲仲邊好睇？歌仔都有得你唱︰「無敵是最寂寞，最是痛苦~~~」，但大家都仲會記得無敵嗰隊叫拜仁，但又有邊個記得之後嗰兩句「未得一展抱負，更是痛苦」嘅其他球隊？雖然係咁，歇冬後25號德甲又開波喇，我都死忠繼續睇！

 

 

第一個喺德甲入波嘅中國人就係楊晨

 

曼聯的救世主 --- 莫耶斯

費格遜走, 莫耶斯來, 本來就令人摸不着頭腦, 只是信任爵爺的眼光, 抱着姑且一試的心態去看待莫帥. 半季過去, 莫帥叫所有反曼的朋友興奮不已, 破盡所有紀錄, 希望他有多久就教多久. 其實當你的死敵已不在爭標的範圍, 正常而言, 戾氣也稍降, 只是過去二十年曼聯雄霸英超, 反曼的朋友才竭斯底里的叫嚷不停, 唯恐魔迷聽不到他們的嘲笑...

紅魔會像利物浦一般, 一沉廿載??? 這是很多人的迷思. 這讓筆者想起一件事, 季前極多阿仙奴迷炮轟雲格, 數落他八年無冠, 險簽系列多不勝數, 但係雲格一個釜底抽薪, 喺轉會窗前簽下奧斯爾, 喺上半個球季呼風喚雨, 直有打破錦標荒的氣勢. 在這個時候, 抽水的朋友出來, 不斷數說雲格機關算盡, 翻雲覆雨之能, 將雲格捧了去神位...

毋容置疑, 雲格這一手極為漂亮, 而在另一面, 他的死敵費爵爺真的那麼失算, 栽到了底?? 筆者有點不同的看法. 環顧歐洲球壇, 稱得上豪門的, 砸金如土的不出十間球會, 皇馬, 巴塞, 聖日耳門, 摩納哥, 曼城, 車路士之外, 實在找不到太多敵手, 他們的共通點是什麼?? 就是有強硬的金主在背後, 不要說皇馬沒金主, 整個皇室都在賭上他們的名譽, 和巴塞打球會戰, 那可是分裂與統一的關聯...

紅魔在格拉沙入主後, 背上大批債項, 已令粉絲大為不滿, 球會亦已沒有九十年代揮金如土買人之舉, 只要看看每年費格遜都只在陣容上小修小補, 還不斷說陣容夠厚不用大執, 就知道格拉沙在背後收緊了水喉, 如果好像fm之說, 每年曼聯的轉會資金只有三千萬鎊, 實不為奇. 

就像上市時所說的一樣, 曼聯的隱憂就是費格遜退休. 費格遜怎會不知這隊紅魔已是強弩之末, 後防空虛, 中場渙散, 不來個大換血, 根本不夠看. 這時爵爺適時退下來, 交棒莫耶斯, 時機之準, 無出其右. 要莫耶斯拯救危牆於既倒, 本就是天方夜譚. 費格遜有什麼陰謀陽謀沒人知, 不過費sir可從沒指摘過美國班主, 關係還好像很融洽, 就像決心怎也要留下來施展他的魔法一般...

請容筆者作個假設, 曼聯繼續不濟, 無冠軍, 無得打歐聯, 曼聯吸水能力驟減, 咁喺美國班主心目中, 佢仲係唔係一隻金蛋呢, 還只是一塊食之無味的雞肋?? 對美國佬來說, 從來都是掠水為先, 只要看他們每年攫取億元袍金便明暸, 如今樹倒猢猻散, 粉絲們期待這些孤寒財主大破慳囊買人, 是否有點痴人說夢. 這陣子曼聯的股價已不斷下滑, 證明投資者並不看好前景. 對格拉沙家族而言, 是死守, 還是得些好意需放手, 這就要考驗他們了. 從來都不乏傳言指卡塔爾皇室對曼聯虎視眈眈, 若然格拉沙要搵水泡走佬, 只要不是獅子開大口, 中東的糖果爸爸當然不介意接火棒...

到時要錢有錢, 要人有人, 這個是否費格遜和卜比查爾頓肚內的墨圈, 推莫耶斯去當替死鬼. 筆者不知道. 只是人有人路, 魔有魔道, 紅魔沒落得太快, 太詭異, 內裡是否有不可告人的想法在醞釀, 還是由球迷去判斷好了...

猜想到此為止, 喺投資角度嚟講, 就梗係沽曼聯股票最好, 不過要買美國股票不太易, 筆者建議大家追買紅魔對家, 再買個對家首名入球, 這陣子的斬獲實在不差. 紅魔下仗再鬥史雲斯, 一敗再敗其實唔難. 當然, 小注怡情, 大注發財, 大家都係怡吓情就好啦...!!!

費Sir : 喂, 仲未到時候, 千祈唔好贏波呀~

2014 睇育焦點

新一年依然係要睇波嘅。都知道香港人忙，未必成日芒住sopcast，所以9news決定幫大家加加料，帶出睇波嘅鮮味，哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈

雞啼時看世界盃

等咗四年嘅盛事就快上演，除咗聽到悶嘅西巴阿德荷意葡法之外，比利時同哥倫比亞陣強對手弱，隨時殺上八強四強。大英祖國呢? 根據做直播嘅三色台叻字輩台柱話，呢隊英格蘭肯定係近幾十年最強。真係架？好叻呀！是但選個史達寧入去都夠啦！不過奉勸果位台柱唔好輸賭祖國攞到冠軍喎，唔係小編怕你跪到大溪地都唔掂。

想要幾多球，出聲啦

經歷過做柱男嘅前年，上年比人笑If you can beat them, bite them嘅蘇亞雷斯，終於大熟大勇，過埋新年聯賽已經入咗20球，埋單要有30球其實唔難，而猁亦少有地半季踩入前四。除左豬一般嘅隊友之外，蘇七不如擔心自己會唔會又衰手球咬人好過啦，兩星神鋒艾斯巴斯等緊你停賽架。

紅魔去咗邊？

執筆時曼聯跌到落第七，老實講以其現時嘅陣容，真係可以學Tree根講句「肯撚定有問題」，執一隊波唔係一朝一夕嘅事，睇吓阿狗N年無冠就知。或者季中買番兩三個球員番黎，炆邊撈到前四都唔定。只係，估唔到費蛇除咗帶走佢嘅戰術同調動，仲帶走埋韋比同埋4424。雖然唔可以怪晒莫耶斯，但望住小強工程師馬天尼斯帶領愛華頓踢到曉飛，酸唔酸？

英冠等住你

年年到季尾，感覺都係睇護級仲精彩過爭標。今年小強雖死，不過佢嘅精神長存，睇下侯城主場數富咸六球就知啦。兵弱陣殘真係冇得講，但格衰就係抵死。依家地球聯合軍嘅槍口，一致對住卡迪夫城，衰咩？衰佢老板囉。陣前不和陣後易帥，仲要換埋人地嘅傳統藍色。即係點？即係好似金絲雀變咗青頭雀，切爾西變咗路姆西咁囉。仲唔明? 贈你三個字：不言而喻。

講番呢個星期，過左聖誕快車大家都要休息吓，想邊食晚飯邊睇波？有計，傳說中六四開嘅良心台，直播蘇超些路迪造訪聖美倫。聖美倫咩黎? 我都唔知，不過呢隊波啱啱借咗紐記個妖人阿當甘保，打開FM嘅球探們可以留意吓。至於些路迪，值得一提係佢哋已經連續一個月開細，又連續三場一比零。想有錢買壽包掟吓人嘅，不妨追吓。唔講咁多啦，總之約定大家，星期日8:45pm，一齊幫亞視爭取一點收視。

圖: 睇良心台，點少得傾國傾城嘅良心小姐?

跨越13，憧憬14

2013打甩脾，不知不覺到年尾。各位球迷嘅愛隊迄今打成點呢？對現時各地嘅聯賽榜又有咩睇法？隨住各個聯賽「收爐」，我哋就同大家一齊回顧蘇花，前膽餘下！

歐洲眾列強之中，喱個上半季令人意外嘅，應該都有西班牙份喇。事關雙巨頭皇馬巴塞爭奪多年的「西超」，今年終於出現「第三者」──就係「床單軍」馬體會喇！憑住「新移民」迪亞高哥斯達嘅神勇表現，「馬體」成功拖住床單入被竇，同一對老夫老妻大激鬥！至於「剩低」嘅「西甲」，另一支紅白戰隊畢爾包暫時佔優，但身後有三隊虎視眈眈，巴斯克分子可唔可以激進到最後會係2014嘅另類亮點。

沉寂多時既意大利，季初一度有隻羅馬跑出，不過迢長路遠下，半途都係俾一班嘅「斑馬」追過，而後面仲有由兩匹「前皇馬」帶動嘅拿玻里追緊上嚟。米蘭兩隻老牌名駒呢，似乎真係咪咗埋欄，暫排5同13。最後邊個會跑出喱條四連環？要估，其實都幾難。

唔知拜仁係咪成日拜神，2013上半年拜出歐洲冠軍，下半年又求到近年死敵「蜜蜂仔」拆翼，喺金牌教頭哥帥帶領下，已經放甩第二位7分。德甲同該國經濟一樣，喺歐盟亂勢中都算相對穩定喇。而有錢雖然唔係萬能，但起碼就煲起咗法甲嘅兩個巨人。大巴黎同摩納哥，遲啲唔知會唔會「起革命」，好似西班牙咁「成立」「法超」呢？

而最後講到2013嘅代表作「激戰」喇喎，當然唔係張家輝，而係現時嘅英超形勢。今季英倫起風雲，好似十幾年前嘅意甲一樣群雄並起，打完18輪，第一同第八竟然只差8分！阿記彷彿中國，經歷多階段改革開放，終於再次「大國崛起」，但係咪真係可以硬到最尾，就還需觀察。曼城喱隊酋長金磚國，講錢冇問題，不過想話事似乎要有更穩定嘅發展喇。車仔跟得老闆艾巴多，今季俄羅斯一樣隔岸觀火，伺機出手。利記同拖肥糖喱對默郡兄弟就十足歐盟，似係復甦緊喎，但隱憂依然好多。至於曼聯，不如睇吓美國，皇者都有墮皮時，但你點踩佢話佢唔掂，依然大把人信佢可以翻身，「We are great American」，「積分懸崖」？ No problem！最後最陰公就要數熱刺，領導人哈利叔一走，繼承者鑊鑊出招都雷聲大雨點小，結果只係俾人笑，不過北韓嘅肥仔金都好彩仲健在，保亞斯就慘喇俾人斬埋頭。

仲有一星期唔夠就新年，2013球壇就算幾精彩，「但要走總要飛」。希望各位球迷嘅愛隊，2014可以勁到衝上雲霄，「雲外看新生趣」啦！先捷祝大家，Happy New Year！

Jingle ball, Jingle ball, 正好睇咩ball？

一年容易又聖誕，想同囡囡過返個特別嘅佳節，有咩好得過激烈嘅運動、火熱嘅大戰──即足球先？球迷們當然想即刻噓我一聲：「聖誕正日邊有波睇？英超快車都要等boxing day啦！」嗱嗱嗱，睇住個芒嘅毒拎平時仲做唔夠咩，聖誕佳節約囡囡，緊係一齊親身感受現場氣氛！「吓？現場？」冇錯！聖誕正日下晝三點就正正有場大戰，仲要近在咫尺喺旺角場上演，就係高級組銀牌賽四強既南華對東方喇！

「扯！本地波！」唔使咁心急扯住，冇睇開嘅朋友可能唔知，今屆東方重返甲組後大展拳腳，先後搵嚟基奧雲尼、伊達等幾個實力球員加盟坐陣，又有名宿高尼路執教，而耳熟能詳「單刀橫傳底線傳底」嘅左倫右李，歐偉倫同李健和仲係球隊副總監添。東方今季蘇花踢得唔錯，聯賽暫列第四，喱場同第二嘅班霸南華絕對有得揮！而且唔使怕囡囡入到去冇個人識喎，文彼得、李威廉李康廉兄弟早幾年拍過雞汁台四葉草系列嘅《南華夢飛翔》，都係半個靚仔明星架。ok就算真係悶親佢嬲嬲哋，唔怕，旺角場出面係花墟，即刻出去買紮花氹返佳人就掂晒啦。而且睇完波五點幾，太子一帶食肆酒吧林立，仲可以帶囡囡食返個溫馨聖誕大餐，簡直perLfect呀！吓？你話你一支公「這些機會」？南華東方一眾打氣團，大把靚女粉絲，融入其中就唔使過lonely x’mas啦！

最後，去到旺角場門口囡囡先知你聖誕竟然帶佢去睇波黑晒面點算？「傻豬，你以為我真係帶你嚟睇波咩？買花送俾你咋！」放心，幾個街口外嘅朗豪坊依然有hello kitty等住你。仲行呀？想拖住包公過聖誕咩，出太子道西搭的啦！

藍衫：東方沙龍嘅文彼得

紅衫：南華嘅李威廉

恒大之進擊

時間:2013年12月14日晚⋯⋯

人物: S: 蘇古迪 T: 史必得

T; er……阿蘇呀，玩籮！
S: 唔得閒呀，因間有場大波要睇呀。
T: 有乜大波呀? 曼城對阿仙奴定係熱刺對利記先?
S: 梗係唔係呢啲英超垃圾波啦，係世冠盃廣州恒大對非洲嘅艾阿里呀。
T: 廣…州…恒…大…嘩！聽到都扯晒…….火呀，有乜咁好睇呀，小小蘇你。
S: 嘩！我國一哥衝出亞洲喎！WIN咗呢場仲可以對拜仁。
T: 對拜仁咪死肯梗！我敢肯定佢對拜仁實門常開，仲係要直達腸道雙開嗰隻。
S: 我夠知啦，不過恒大入到圍踢世冠，已經難能可貴。
T: 喺我人生中無嘢係入唔到嘅。
S: 你諗吓，我國咁強大，要乜就買到乜，酒莊、豪宅、官位、靚車、女人、男人，但係呢隻亞冠盃唔係話攞就攞到，因為佢一場最多可以出三個外援加一個亞援，即係話就算你好有錢買到美斯C朗巴爾加埋香川真司，都唔可以再出埋法卡奧利雲同埋碧基，其他七個位仲要靠班國足劉羅做骨幹，點贏？哈，但係真係畀佢贏到，勁！
T: er……係喎，國足輸畀班泰仔五個一皮喎，可能班泰仔有幾個好似阿POY咁正，嘩，變性人，我like
S: 唔講咁多啦，開電視睇波先……咦？冇嘅……小，原來都無得播，呢個乜久基佬台嚟架？剩係播埋啲爛鬼德甲日職澳職垃圾波，每個月三舊幾水架！
此時，史必得已站在蘇古迪後方，熄電視……

紐倫堡對緬因斯

作為高質嘅球迷，如果今周末約咗一個或多個囡囡睇波，要威嘅，一定係睇德甲：紐倫堡對緬因斯。今季紐倫堡由兩條㗎仔中場---長谷部誠同 清武宏嗣孭飛，打到十幾輪，一場未贏過。換做麻雀術語，四圈牌兩圈咁滯都未開餬，可想而知「東瀛雙傑」心情一定非常糾結。倘若今場先失守，高質球迷此時可 化身反日分子疾呼：「抵死丫！侵擾我國防空識別區嗱！緬因斯，蹂躪呢兩條㗎仔！」登時散發出一種見多識廣嘅氣質。之但係人算不如天算，若果咁神奇紐倫堡領先，唔使怕，高質球迷又可以搬出另一套理論：「大家唔好咁膚淺，雖然日本仔侵我國領域，但日本足球係代表亞洲嘅，我哋亞洲人球係唔會輸畀歐洲人嘅！」一種有容乃大嘅氣度貫徹全身。因此，睇呢場德甲波表面睇好叉悶，實情係男士們向女士們騷哥利嘅一個好機會；女士們邊聽邊增長通識，又可趁機睇吓紐倫堡超級靚仔、21號柏登夏特；小朋友更可告訴父母，紐倫堡係歐洲玩具之都，問吓幾時帶佢去...十萬個理由下，無理由錯過！高質男球迷此時大概醒覺並問：挑！咁和緊點算？唔使淆，即刻拎係個遙控，轉個台，卡達真拿對巴塞，可能仲好睇。

長谷部誠(左)及清武宏嗣(右)

柏登夏特