適逢馬年，馬場今日必定有大批馬迷入場支持，旺丁又旺財；不過除此之外，亦有另一班「馬迷」會齋戒沐浴，今晚誠心力撐自己嘅「心水馬」喎，講緊嘅係「皇馬迷」、「馬體迷」同埋「羅馬迷」，因為喱三隊今晚將會出戰馬年第一擊，一眾「馬迷」自然希望開門紅，拉個頭馬攞個頭彩啦！而眾所鳩知，農曆年初三，求靈籤最啱，今次就等我哋化身成「捷足仙人」，幫喱三匹弗馬，用特別的求籤技巧求返支靈籤，睇吓今晚、下半季，以至喱個馬年，佢哋三隊有冇運仔！
嗱嗱嗱，咪話唔賣花讚花香，我哋嘅求籤技巧真係很特別而又科學化：車公靈籤有96支，所以我哋用casio計數機random掣揀個三位數，再攞尾兩個字作為籤號(唔明點用？返中學問阿sir啦)。結果就為皇馬求得五十九籤上籤，馬體會五十八籤中籤，同羅馬嘅五十一籤中籤。
好，一齊睇吓籤文喇！
皇馬嘅五十九籤係「名也成時利也成，原來教子在窮經；若然不積修行路，縱有名利亦恐傾。」解曰名利兩得、求財暫發、不去其惡、福盡禍來。籤文話皇馬名利兩得，睇落幾好，今季喺巴塞下滑同馬體會未完全爆發之時，可能有機會爭到冠軍，而原因係「教子在窮經」，即係一班年青嘅小將對爭標過程有相當幫助，之但係皇馬不嬲財大氣粗，如果不去其惡又將有潛質嘅佢哋掃走，就算今季有盃落袋都「縱有名利亦恐傾」。睇嚟夏季有冇翻版奧斯爾事件，將會影響住皇馬嘅馬年運勢喎。
至於馬體會嘅五十八籤係「臨機亦要細思量，妄作妄為欠主張；見利自然無計義，貪心誰道能久長。」解曰貪心折福、求財半遂、胡作非為、貪不遠貧。明顯地，今季馬體會彈起，令西甲近十幾年嚟第一次有返競爭。不過籤文就勸馬體會「臨機亦要細思量」，施蒙尼嘅大膽戰略唔好太過火，唔係可能慘於門前撻Q。仲有喎，今季陣中煲起迪亞高哥斯達、高基等球員，歐洲好多大會都虎視眈眈，如果夏天貪財賣走晒，喱支啱啱崛起嘅異軍就「道難長」喇。
最後羅馬嘅五十一籤係「事業求謀且待時，若然亂動失原機；馬行千里須防倦，遠病年深不可醫。」解曰待時至、莫急進、留餘地、莫強求。羅馬今季一度超越近年壟斷意甲嘅祖記，可惜「馬行千里倦」，而家後勁不繼，籤文似乎就揭示羅馬爭冠今季仲未係時候，太勉強隨時連歐聯喱個「原機」都失埋，而chur得太行仲可能令主力受傷，球隊戰績到時就真係「不可醫」囉。
睇到喱度，可能已經有唔少「馬迷」爆粗話捷足仙人嘅解釋肯肯定有問題。冷靜啲先，新年流流求支籤都係攞個意頭開玩笑姐，你睇每年發叔傻更更個歡喜樣，就知認真就輸了啦！膠噏咁多，不如睇波，喱三隊今晚將會喺十點、兩點同四點分途出撃，大家千祈唔好錯過喇。
最後我哋捷足仝人，恭祝各位球迷嘅愛隊喺馬年，求人得人，馬到功成！
沒有留言:
張貼留言