魔術電影-《掃毒》

~小。評台~

電影《掃毒》，陳木勝執導，劉青雲夥拍古天樂夥拍張家輝夥拍盧海鵬夥拍泰國變性女星！屌！未入場呀，淨係睇個卡士都扯扯地！
見到係陳木勝大導作品，個名仲要叫「掃毒」，我本身真係諗住入去係睇套熱血沸騰嘅警匪片，丫，點知睇到尾先知呢套係用差佬故事做包裝，實情暗講魔術表演嘅電影，係咪估佢唔到先？
故事唔詳講，我淨係講講三個重要嘅表演場景。

劇情黎到古張二子比泰國毒梟鵬哥捉住，而劉就挾持住鵬哥個變性女兒，鵬哥提出一個換一個，要劉係兩個出生入死嘅兄弟中揀一個留低。最後劉揀左古天樂，咁張家輝就要死啦，尐泰國仔殺人呢就好撚麻煩嘅，係都要係個滿布鱷魚嘅潭上面，兜肚打張一槍，等佢跌落水餵鱷魚。
比人唔夠兩步嘅距離打一槍，再跌落去有卅幾四十隻鱷魚嘅潭入面，仆你個街，張家輝竟然唔死得！係佢蕩氣迴腸嘅回憶入面提到，佢係咁惡劣嘅情況下仲可以蛙式併自由式咁游返岸邊，果種不可思議，令我不禁聯想起香港魔術師Louis Yan果個水底脫困魔術，勁呀！

故事發展得好快，黎到最後場景要打最後大佬同佢班o靚，首先就黎一場開主角威能外加金手指先做到嘅作弊式槍戰，點解咁講？一般槍戰片，即使主角本身明明知道自己係唔會死，都會做下樣揾遮掩物擋子彈。掃毒三子好誠實，直挺挺企係度開火，大方承認主角點打都唔會死嘅事實，更甚嘅係頭二十個衝出黎嘅嘍囉竟然一槍都開唔到就收左皮，只能夠以嘆為觀止黎形容。

電影尾段再黎一個刀鋸美人，可惜呢次表演失敗左，鋸死左個美人。事源張家輝比鵬個仔捉住左要用刀埋佢單，呢個時候張個變性老婆衝出黎阻止，混亂間殺手橫揮一刀，淺淺咁片中左阿老婆個肚，呢一刀呢需要形容一下先可以令各位理解筆者當時嘅感受，呢一野片得好淺，扣除件衫嘅阻礙，真係好懷疑能唔能夠穿透阿老婆個肚嘅脂肪，對比起片，揩可能更加貼切去形容呢一刀，但就係呢輕輕一揩，竟然就揩死左阿老婆……本人當時係睇到目定口呆，到依家都唔識反應。

講真，如果唔深究劇情，呢套戲絕對抵睇，比幾十蚊有劉青雲，古天樂，張家輝，仲有鵬哥睇，仲想點？但問心我真係好想睇返一套即使深究劇情都無得彈嘅港產片，如果拍到，比一百蚊入場我都支持。係咁。

小麻理仙人